AQŞ İran belän kiyerenkelek arqasında Yaqın Könçığışqa tağın ber xärbi köymä cibärä
AQŞ ilbaşı Donal'd Tramp xärbi köçlärneñ artuı Tährannı söyläşülär östälenä utırtaçaq dip ömetlänä.
Amerika teleradiokompaniyäse “CBS” pänceşämbe könne xäbär itkänçä, AQŞ ilbaşı Donal'd Trampnıñ zur flotnıñ İranğa taba xäräkät itüe turında äytüennän soñ, AQŞ Yaqın Könçığışqa tağın ber xärbi köymä cibärde.
“CBS” bu xärbi korabnıñ Arleigh Burke sıynıfındağı Aegis idarä itelä torğan raketa êsmineśı USS Delbert D. Black buluın açıqladı.
“CBS” mäğ’lümatına qarağanda, AQŞ Üzäk komandirlığı cawaplılığındağı başqa AQŞ korabları arasında USS Avraam Linkoln aviataşuçı, USS Spruance, USS Murphy, USS Frank E. Petersen, USS McFaul häm USS Mitscher êsmineśları, şulay uq USS Canberra, USS Tulsa häm USS Santa Barbara yar buyı xärbi köymäläre bar.
Pentagon Tähran belän kiyerenkeleklär däwam itkän şartlarda töbäktäge köç balansında möhim üzgäreş yasap, aviataşuçı höcüm törkemen, aldınğı suğış oçqıçları flotın häm raketağa qarşı saqlanu batareyaların töbäkkä tiz arada urnaştıruın däwam itä.
Tramp çärşämbe könne zur flotnıñ İranğa taba xäräkät itüen qabatlap, Tährannıñ östäl artına utırıp Vaşington belän söyläşülär alıp baruına ömet belderde.
Saqlanu ministrı Pit Xerset pänceşämbe könne Vaşingtonnıñ İrannıñ atom -töş qoralları tırışlıqlarına qomaçawlaw öçen barlıq variantlarnı qullanırğa äzer buluın äytte, läkin diplomatik kileşüneñ äle dä mömkin buluın assızıqladı.
AQŞ xärbi räsmiläre ğıynwar başlarında töbäkneñ zur bäreleşkä äzer tügellegen beldergän ide.
İran armiyäse kiyerenkeleklär tiz köçäyü säbäple teläsä nindi höcümgä qatğıy häm tiz cawap bireläçägen iskärtte.