Ärdoğan: İranğa yünältelgän qanunsız höcümnär töbäktä iminlek riskların arttırdı

Törkiyä İlbaşı Räcäp Tayyip Ärdoğan İranğa yünältelgän qanunsız höcümnärneñ töbäktä iminlek riskların arttıruın äytte.

İlbaşı apparatı êlemtä idaräsennän belderülärençä, Räcäp Tayyip Ärdoğan comğa könne Antaliya Diplomatiya Forumı qısasında Paqıstan xökümäte räise Şäxbaz Şärif häm Qatar Ämire şäyex Tämim bin Xämäd Al Sani belän oçraştı. Ärdoğan älege oçraşular barışında Törkiyäneñ utnı tuqtatunı saqlaw häm daimi tınıçlıqnı täêmin itü tırışlıqların däwam itteräçägen häm bu êşlärne köçäytäçägen belderde.

Öç lider, şulay uq, böten töbäktä daimi häm totrıqlı tınıçlıq urnaştıru öçen mömkin bulğan urtaq adımnarnı qaradı.

Utnı tuqtatu öçen tırışlıqlar

Ärdoğan belän Şäxbaz Şärif ikeyaqlı mönäsäbätlärne häm İran belän bäyle däwam itüçe utnı tuqtatu söyläşülären qarap, artuçı diplomatik koordinatsiyäneñ ähämiyätenä basım yasadı. İlbaşı, Törkiyäneñ ênergetika, säwdä häm saqlanudan başlap, töp tarmaqlarda Paqıstan belän xezmättäşlekne kiñäytäçägen äytte.

İlbaşı Räcäp Tayyip Ärdoğan Paqıstannıñ utnı tuqtatunı täêmin itüdäge rolen maqtawğa layıq dip taptı häm ike yaqnıñ da monı tiränräk tınıçlıq kileşüenä äyländerü öçen êşläyäçägenä basım yasadı. Ärdoğan, Ğazzädäge utnı tuqtatunıñ nığıtılırğa tiyeşlegenä iğtibar itte häm yaña regional' iminlek sistemasına çaqırdı.

Süriyä liderı belän söyläşülär

Törkiyä ilbaşı Räcäp Tayyip Ärdoğan forum qısasında Süriyä däwlät başlığı Äxmät äl-Şaraa belän dä oçraştı. İlbaşı Ärdoğan, Süriyäneñ töbäktäge bäreleşlärdän çittä qalırğa tiyeşlegen äytep, Änkara häm Dimäşq arasındağı xezmättäşlekneñ kiñäytelüe Süriyäneñ ayaqqa basuı öçen möhim buluın östäde.

Oçraşuda tışqı êşlär ministrı Xaqan Fidan häm Milli küzläw oyışması başlığı İbrahim Qalın belän bergä yuğarı däräcäle Törkiyä räsmiläre qatnaştı.