Törkiyä ilbaşı Ärdoğan ministrlar kabinetına üzgäreşlär kertte

Törkiyä ilbaşı Räcäp Tayyip Ärdoğannıñ imzası salınğan häm “Räsmi Gazet”ta dönya kürgän qararlar näticäsendä yaña yustitsiya häm êçke êşlär ministrları bilgelände.

Qararlarğa kürä, İstanbulnıñ baş prokurorı Akın Gürläk, Yılmaz Tunç urınına, yustitsiya ministrı, Ärzurum gubernatorı Mostafa Çiftçi isä Ali Yärlikaya urınına êçke êşlär ministrı itep bilgelnde. Bu bilgeläwlär Törkiyä Cömhüriyäte Konstitutsiyäseneñ 104nçe häm 106nçı maddälärenä tayanıp yasaldı.

Räsmi belderülärdän soñ Ali Yärlikaya êçke êşlär ministrı wazıyfasın Mostafa Çiftçigä tåpşıruın rasladı häm aña yaña êşendä uñışlar teläde. Yärlikaya sotsial’ çeltärlärdäge yazmasında 2023 yılnıñ 4 iyunennän birle ilbaşı Ärdoğannıñ qararı belän êçke êşlär ministrı bulıp xezmät quyuın äytte häm bu waqıt êçendä kürsätkän yärdäme öçen ilbaşına räxmäten belderde. Şulay uq, ul êçke êşlär ministrlığı xezmätkärlärenä tärtip häm iminlekne saqlawdağı tırışlıqları öçen räxmät äytep, üzeneñ urınına kilgän xezmättäşenä uñışlar teläde.

Akın Gürläkneñ yustitsiya ministrı itep bilgelänüennän soñ Yılmaz Tunç ta sawbullaşu möräcäğaten çığardı. Tunç, İlbaşı Ärdoğan belän bergä êşläw häm xakimiyättäge partiyäneñ säyäsät yulına öleş kertü ğorurlıq buluın, 2023 yılnıñ iyunendä ministr itep bilgelänüeneñ üzenä zur cawaplılıq yökläwen belderde. Uzğan 23 yıl êçendä Ärdoğan citäkçelegendä demokratiya häm xoquq östenlegen nığıtu öçen yasalğan reformalarğa iğtibar cälep itte. Tunç kiläçäktä dä il öçen êşläwen däwam itäçägen äytte, şulay uq, Gürläkne täbrik itte.

Yaña bilgeläwlär “Räsmi Gazet”ta basılıp çıqqannan soñ üz köçenä kerde.