“Qaraxantäpä” - 2025 yılnıñ iñ möhim arxeologik urını

Törkiyäneñ “Taş täpälär proyektı”nıñ ber öleşe bulğan Şanlıurfa şähärendäge bu arxeologik urın “Arxeologiya jurnalı”nıñ berençe bitenä urnaştı.

“Qaraxantäpä” (Karahantepe) Törkiyäneñ könyaq-könçığışında urnaşqan häm bar dönyağa tanılğan Göbäklitäpä belän Yaña taş ğasırı urını bulıp tora.

“Arxeologiya jurnalı” tarafınnan 2025 yılnıñ iñ yaxşı 10 arxeologik tabışınnan berse bulıp saylandı häm jurnalnıñ berençe bitenä çıqtı.

Jurnalda tübändäge yullar urın ala: “Altı yıl êlek Qaraxantäpädä berençe taş qorılmalar tabılğan. Bu urın Könyaq-könçığış Anadoluda Yaña taş ğasır çorında yäşägän keşelärneñ xikäyäsen añlata. Bıyıl ike unikal tabış buldı.”

Tabıldıqlar arasında yöze uyıp yasalğan siräk oçrıy torğan taş häykäl häm ber törkem äsär bar.

Jurnalğa kürä, älege obelisk 3 ülçämle keşe yöze bulğan T xärefe räweşendä. Monnan alda tabılğan T räweşendäge häykällärneñ keşe figuraların simvollawı qabul itelä ide, läkin älegä yöze yasalğan häykäl yuq ide.

Qazu törkeme başlığı Näcmi Karul jurnalğa birgän intervyuda bolay dide: “Häykäldä yözneñ buluı bolarnıñ keşelärne simvollawı qaraşına turı kilä”.

Jurnal beldergänçä, älege tabıldıqlar Anadoluda yäşägän êlekke cämğiyätlärneñ dönya añlayışın kürsätep tora.

“Qaraxantäpä” arxeologik urını Şanlırfa şähäre yanında, Yaña taş ğasırğa qarawçı arxeologik urınnardan toruçı “Taş täpälär proyektı”nıñ möhim öleşen täşkil itä.

Törkiyäneñ mädäniyät häm turizm ministrlığına kürä, älege proyekt utırma tormış başlanğannan alıp awıl xucalığı cämğıyätläreneñ üseşenä qadär Yaña taş ğasır qaldıqların tikşerä.

Törkiyäneñ mädäniyät häm turizm ministrı Mäxmät Nuri Ärsoy “NSosyal” platformasında “Karahantäpä”neñ jurnalda urın aluın: “Karahantäpä dönya säxnäsendä”, - diyep, täbrik itte.

“Anadolunıñ 12 meñ yıllıq xikäyäsen bar dönyağa añlatırğa, mädäni mirasıbıznı saqlarğa däwam itäçäkbez”, – dide ul.