İstanbulda Xalıqara yäş êşmäkärlär kongressı uzdı
Kongressnıñ bıyılğı teması "Future: Today" (Kiläçäk: bügen) buldı
Törkiyä ilbaşı idaräseneñ İnvestiśiyalär häm finans ofisı başlığı Burak Dağlıoğlu däwlätneñ barlıq mömkinlekläre häm säyäsäte belän êşquarlar yanında buluın belderep: "Ütkän yılda başlanğıç êtaptağı texnologiya proyektlarına ğına 700 million dollarğa yaqın investiśiä kertelde," — dide.
Yäş “MÜSİAD” tarafınnan ike yılda ber tapqır oyıştırıluçı kongress bu yulı "Future: Today" (Kiläçäk: bügen) teması belän açıldı. Açılış çığışların İlbaşı idaräseneñ İnvestiśiyalär häm finans ofisı başlığı Burak Dağlıoğlu, “MÜSİAD” Bäysez sänägätçelär häm êşmäkärlär assośiaśiyase ğomum başlığı Burhan Özdämir, Yäş “MÜSİAD” başlığı Mağsum Usta häm “UGİK” başqarma şurası başlığı Ömär Faruk Çälik yasadı.
Dağlıoğlu bilgesezlek çorında êş qorunıñ härkemneñ qulınnan kilmäwenä iğtibarnı cälep itep: "Monda liderlık kürsätäçäk şäxeslärgä ixtiyaç bar. Bilgesezlektä êş qorırğa kemneñ batırlığı citä? İñ möhime — êşquarlar. Alar biznes belän genä şöğıllänmi. İlbaşıbız säyäsättä häm diplomatiädä, minemçä, iñ zur êşquarğa ürnäk bulıp tora," — dide.
Burak Dağlıoğlu, cämğıyättä êşquarlarnıñ, qızğanıç, yış oçramawların belderep, şunıñ öçen yaxşı êşquarnıñ qıymmätle buluına basım yasadı.
“MÜSİAD” başlığı Burhan Özdämir isä täêminat çılbırlarınıñ özelüen häm köçlär balansınıñ üzgärüen äytte. Ul yäş êşquarlar wazıyfasında şirkät qoru ğına tügel, yaña cämğıyät modelläre häm yaña cämğıyät añlayışın buldıru buluına basım yasadı.
Ütkändä batırlıqnıñ riskka kerü ikänlegen beldergän Özdämir: "Bügen isä batırlıq — êtik bulıp qalu, qısqa möddätle faydağa “yuq” dip äytä belü häm ğadel tärtip, ğadel sistema öçen moña qadärge sistema êçendä qatğıy bulu," — dide.
Yäş “MÜSİAD” başlığı Mağsum Usta isä êş dönyasında keşene tıñlıy belgän keşelärneñ kiräkle buluın äytte. "Yaxşı tıñlawçılar kliyent äytmägän süzlärne dä añlıy. Partnyerınıñ şiklänüen sizä. Komandası tınıp qalğan waqıtta problemanı kürä. Tıñlaw disśiplinası — liderlik üzençälege,” – dide ul.
Yaña buınnıñ bik sälätle buluın beldergän Mağsum Usta, alarnıñ tiz öyränüen, qıyu häm üz-üzlärenä ışanuın, läkin iñ yış oçrağan kimçelekneñ tüzemsezlek buluın assızıqladı.