Törkiyä, Sudanda däwam itkän bäreleşlärdän zıyan kürgännärgä yärdäm kürsätü maqsatında, 2 600 tonna gumanitar yärdäm töyälgän altınçı “İzgelek köymäse”n cibärde.
Mersin portınnan yulğa çıqqan köymä Afätlär häm ğadättän tış xällär belän idarä itü räislege (AFAD) koordinaśiyäsendä cirle xakimiyät organnarı, ictimağıy oyışmalar häm Qatar üseş fondı belän bergä äzerlände.
AFAD başlığı Ali Hamza Pehlivan, Törkiyäneñ Sudandagı gumanitar krizisqa bitaraf qalmawın belderep, monnan alda 2024 yılda 5 500 tonna yärdäm cibärelüen, ä uzğan ayda öç köymä belän 30 000 çatır cibärelüen bilgeläp ütte.
Sonğı köymädä azıq-tölek, şäxsi gigiyena äyberläre, mediśina kiräk-yaraqları häm sıyınu materialları bar.
Pehlivan üz belderüendä bolay dide:“Sudanda küçenergä mäcbür bulğan keşelär öçen sıyınu urını ixtıyacı dekabr’ ayında kritik däräcägä citüen isäpkä alıp, 7 dekabr’dä yärdäm korabların cibärä başladıq. Ber-ber artlı öç köymä cibärep andağı qärdäşlärebezneñ sıyınu urını ixtıyacların qanäğat’länderergä tırıştıq”.
Pehlivan şulay uq Törkiyäneñ Ğazzägä gumanitar yärdämeneñ dä däwam itüen belderep, kiläse atnada yegermençe yärdäm korabınıñ kitäçägen häm älegä yaqınça 105.000 tonna yärdäm citkerelüen belderde.
Sudanda 2023 yılnıñ aprelennän birle armiya belän paramilitar Operativ yärdäm köçläre arasında ütergeç bäreleşlär küzätelä, bu konflikt meñlägän keşeneñ ülemenä häm millionlağan keşeneñ küçenüenä kiterde.
Sudannıñ 18 ştatınnan Darfur töbägendäge bişese Operativ yärdäm köçläre kontrolendä. Tön’yaq Darfurnıñ tön’yağındağı berniçä töbäk äle dä armiya kontrolendä qala.
Sudan armiyäse, başqala Xartumnı da kertep, kön’yaq, tön’yaq, könçığış häm üzäk töbäklärdä qalğan 13 ştatnıñ kübesendä älegä qadär östenlegen saqlıy.
