Qıtay xalıqara cämäğat’çelekne Ğazzä öçen qatğıy ğamällär başqarırğa çaqırdı
İlbaşı Si Cinpiñ suğıştan soñğı idarä häm Ğazzäne yañadan torğızu êşläreneñ “Fälästinneñ fälästinlelär tarafınnan idarä itelüe” prinśibına turı kilergä häm Fälästin xalqınıñ iradäsenä xörmät kürsätelergä tiyeşlegen äytte.
Däwlät mediası çärşämbe könne citkergänçä, Qıtay ilbaşı Si Cinpiñ Ğazzädä daimi utnı tuqtatuqa çaqırıp, xalıqara cämäğat’çelekne Fälästin xalqınıñ legal’ xoquqların yaqlaw tırışlıqlarnı arttırırğa çaqırdı.
“Xinhua” xäbär agentlığı beldergänçä, Si sişämbe könne BMOda Xalıqara Fälästin xalqı belän teläktäşlek könenä bağışlanğan çarağa cibärgän qotlaw yullamasında Fälästin mäs’äläseneñ Yaqın Könçığış qarşılığınıñ üzägendä toruın, xalıqara xaqlıq, ğadellek häm töbäk totrıqlılıgına turıdan-turı täêsir itüen belderde.
Si Cinpiñ üz yullamasında:“Berläşkän Millätlär Oyışması İminlek şurasınıñ daimi äğ’zası bularaq Qıtay Fälästin xalqınıñ üz legal’ milli xoquqların yañadan alu köräşen yaqlıy”, — dide.
Ul şulay uq kiyerenkelekneñ artuın totqarlaw häm köç qullanu yañadan başlanmasın öçen Ğazzädäge krizisnıñ xalıqara cämäğat’çelektän tağın da proaktiv adımnar taläp itüen assızıqladı.
“Fälästin fäälästinlelär tarafınnan idarä itelergä tiyeş”
Si Cinpiñ suğıştan soñğı idarä häm Ğazzäne yañadan torğızunıñ “Fälästinneñ fälästinlelär tarafınnan idarä itelüe” prinsibı nigezendä alıp barılırğa tiyeşlegen; Fälästin xalqı iradasenä tulısınça xörmät kürsätelergä, töbäk illäreneñ nigezle borçılularınıñ isäpkä alınırğa tiyeşlegen östäde.
Ozın möddätle çişeleşlärneñ kiräklegen assızıqlağan Si ike däwläte çişeleşneñ kiñ qırlı häm daimi tınıçlıqqa ireşüneñ töp yulı buluın äytte.
Ğazzädäge gumanitar wäzğıyät’ne tiz arada yaxşırtu, Fälästin xalqınıñ ğazapların ciñeläytü zarurlığına basım yasağan Si, Fälästin mäs’äläseneñ global’ idarä sisteması öçen dä sınaw buluın assızıqladı.
Ul illärne Fälästin mäs’äläsendä cawaplılıq alırğa, köçle adımnar yasarğa, tarixi ğadelsezleklärne tözätergä häm xaqlıq belän ğadellekne yaqlarğa çaqırdı.