Matbuğat öçen qarañğı kön:yaña qağıydälärgä qarşı çıqqan Pentagon xäbärçeläre tanıqlıqların tapşırdı

Pentagon jurnalistları, yaña çikläwlärgä qarşı çıqqanğa kürä, maxsus tanıqlıqların tapşırırğa mäcbür buldı.

“Bügen AQŞ saklanu ministrlığı ilneñ iñ zur media oyışmalarında êşläwçe Pentagon jurnalistlarınıñ tanıqlıqların tartıp aldı,” dip belderde Pentagon matbuğat cämğıyäte üz belderüendä.

Yaña qağıydälärne qabul itmägän jurnalistlarğa Pentagon binasın säğät 17:00 gä qädär buşatırğa quşılğan.

Media oyışmaları bu säyäsätneñ berençe tözätmä xoquqların bozuın äytä. "The New York Times", "The Washington Post" häm "CNN" kebek zur media oyışmaları yaña qağıydälärne imzalawdan baş tartqan. Bu qağıydälär jurnalistlarnı röxsätsez mäğlümat aludan yäki qullanudan tıya.

“Bu qarar jurnalistlarnı milli iminlek turında xäbär itüe öçen cawaplılıqqa tartu häm imzalawçılarnı cinayät êşlärenä tartu yanawı arqasında qabul itelde,” dip belderde cämğıyät.

Cämğıyät äğzaları AQŞ xärbi köçläre turında xäbär äzerlälären däwam itäçäklären belderde.

“Tik şunı onıtmağız, 2025 yılnıñ 15 oktyabre, matbuğat irege öçen qara kön bulıp tarixqa kerep qala,” dip östäde alar.

‘Bik döres söylämäwçe matbuğat’

AQŞ ilbaşı Donald Tramp sişämbe könne saklanu ministrı Pit Xegsetnı yaqlap, matbuğatnıñ “bik döresen söylämäwen” äytte.

Tramp Aq Yortta jurnalistlarğa: “Minemçä, ul matbuğatnıñ dönyada tınıçlıq urnaştıruğa qomaçawlawın uylıy,” dip äytte .

Yaña säyäsät jurnalistlarnı yaña matbuğat qağıydälären tanırğa mäcbür itä. Bu qağıydälärgä kürä, ägär alar yäşeren yäisä yäşeren bulmağan mäğlümatnı raslawların sorap ministrlıq xezmätkärlärenä möräcäğät itsä, iminlek yanawı dip sanalıp, Pentagon tanıqlıqlarınnan mäxrüm qalu riskına duçar bula ala.

Pentagonnıñ bu yaña säyäsäte êlekke "Fox News" alıp baruçısı bulğan Xegset citäkçelegendä matbuğatqa qarata çikläwlärneñ soñğı ürnäge bulıp tora.

"Fox News" ta bu yaña matbuğat çikläwlären qabul itmägän media oyışmaları arasında.