Qıtay, AQŞ İlbaşı Donald Trampnıñ İran belän êş itüçe här ilgä 25% tamğaxanä salımı kerteläçägen iğlan itüennän soñ, üz xoquqı häm mänfäğatlären yaqlayaçağın belderde.
Tışqı êşlär ministrlığı süzçese Mao Ning, sişämbe könne ütkän räsmi matbuğat konferentsiyäsendä Trampnıñ salım iğlanı turındağı sorawğa: “Tarif suğışınıñ ciñüçese bulmayaçağına härwaqıt ışandıq. Qıtay üzeneñ qanunlı xaqların häm mänfäğatlären täwäkkällek belän yaqlayaçaq”, — dip cawap birde. Mao turizm maqsatı belän İranğa säfär itüçe Qıtay watandaşlarına qağılışlı sorawğa isä Pekinnıñ “wäzğiyatne yaqınnan küzätüen” äytte häm “Qıtay watandaşlarınıñ iminlegen saqlaw öçen tiyeşle barlıq çaralarnı küräçäkbez”, — dide.
Qıtay İrannıñ iñ zur êksport yünäleşläre arasında
Tamğaxanä salımı yanawı İrannıñ, başta iqtisadi qıyınlıqlar säbäple başlanğan, läkin soñraq dini idäräne bärep töşerü çaqıruına äylängän soñğı yıllarnıñ iñ zur xökümätkä qarşı protest dulqını belän oçraşqan çorında yasaldı. AQŞta urnaşqan HRANA xoquq saqlaw törkeme protestlar başlanğannan birle, kimendä, 648 keşeneñ ülüen, aralarında demonstrantlar häm iminlek xezmätkärläre dä buluın rasladı.
Tramp düşämbe könne “Truth Social” aşa yasağan belderüendä İran belän êş itüçe härber ilneñ Amerika Quşma Ştatları belän bulğan säwdäsendä 25% tamğaxanä salımı belän oçraşaçağın iğlan itte. Aq Yortnıñ internet säxifäsendä bu säyäsät turında räsmi dokument urın almasa da, salımnarnıñ qaysı xoquqıy wäqalät belän qullanılaçağı yäki İrannıñ barlıq säwdä xezmättäşlären üz êçenä alıp-almayaçağı bilgesez qala.
İran yıllardır AQŞnıñ awır sanktsiyäläre astında bulsa da, aralarında Qıtay, Berläşkän Ğaräp Ämirlekläre häm Hindstan da bulğan, küp illär belän säwdäsen däwam itä. Tamğaxanä salımnarı maqsat itep alınğan illärdän tovar kiterüçe AQŞ importçıları tarafınnan tülänä.
