Franśiyä ilbaşı: “Ukrainanıñ yazmışı bilgelängändä ukrainalılar da östäl artında bulırğa tiyeş”

Fransiyä ilbaşı Êmmanuel Makron, ägär AQŞ däwlät başlığı Donald Tramp belän Rusiyä liderı Vladimir Putin Budapeştta oçraşsa, ukrainnar häm awrupalılar da "östäl artında bulırğa tieş" dip belderde.

Düşämbe könne Sloveniyädä Awrupa Berlegeneñ Urta diñgez illäre sammitınnan soñ ütkän matbuğat oçraşuında Makron, bulaçaq oçraşu ixtimalın "bik yaxşı närsä" dip atadı, çönki "prezidentlar üzläreneñ ikeyaqlı kön tärtiben söyläşä ala."

Makron: "Ukrainanıñ yazmışı söyläşelgändä, ukrainnar östäl artında bulırğa tieş. Awrupa iminlegenä täêsir itä torğan mäsälälär qaralğanda, awrupalılar da östäl artında bulırğa tieş. Minem äytergä telägänem şuşı," dip basım yasadı.

Makron, şulay uq, Fransiyäneñ Ukrainanı yaqlawın qabatlap äytte häm ilneñ däwam itüçe suğış şartlarında kürsätkän tüzemlegen bilgeläp ütte.

London oçraşuı

"Ukraina, innovatsiyälär kertep häm citeşterüne däwam itep, zur qıyulıq belän qarşılıq kürsätä. Bez comğa könne qayber qatnaşuçılar turıdan-turı, qayberläre onlayn bulaçaq "teläktäşlek koalitsiyäse" cıyılışı ütkäräbez häm (Ukraina ilbaşı) Volodimir Zelenskiy da anda bulaçaq. Şulay itep, bez alğa taba xäräkät itäbez," dip äytte Frantsiyä liderı.

Ul Ukrainaga qağılışlı teläsä-nindi solıxnıñ "nıq häm ozın möddätle" bulırğa, xalıqara qanunnarğa turı kilergä häm totrıqlılıqnı täemin itärgä tieşlegen assızıqladı. "Başqaça (tınıçlıq) mömkin tügel. Häm awrupalılar bu mäsälädä härwaqıt açıq buldı," dip östäde Makron.

Uzğan atnada Tramp Zelenskiynı Rusiyä belän kileşügä ireşergä çaqırdı häm ike yaqnıñ da xäzerge front sızıkları buyınça suğışnı tuqtatırğa tiyeşlegen äytte. Zelenskiy isä Ukrainanıñ Mäskäwgä bernindi dä taşlamalar yasamayaçağın qabatladı.

Uzğan pänceşämbe könne telefon aşa söyläşkändä, Putin häm Tramp yaña oçraşu mömkinlegen qaradı, häm ike yaqnıñ wäkilläre sammitka äzerlek êşlären başlarğa kileşte. Oçraşu öçen mömkin urın bularaq Budapeşt qarala.