“İzrail haman da Ğazzägä yärdäm kertüne totqarlıy”

Berläşkän Millätlär Oyışması comğa könne yasağan belderüendä İzrailneñ, utnı tuqtatuğa qaramastan, Ğazzägä gumanitar yärdäm ireşterüne zur külämdä çikläwne däwam itüen citkerde.

Belderüdä awıl xucalığı cirläreneñ zıyan kürüe häm azıq-tölek citeşterüneñ tulısınça dyärlek tuqtaluı assızıqlandı.

BMO süzçese Farxan Xaq N’yu-Yorkta jurnalistlarğa yasağan belderüendä: “Keşelärneñ aşığıç ixtıyacları äle dä zur. Utnı tuqtatu täêmin itelgännän birle çikläwlär tiz genä beterelmi”,-dide.

Xaq süzlärençä, düşämbegä qadär BMO häm partnyerları Ğazzä çik qapqalarında kübese azıq-tölek bulğan 37 meñ tonnadan artıq yärdäm cıyğannar.

Läkin ul yärdämneñ barı tik ike çik noqtası aşa ğına kerä aluın, İzraildän Ğazzäneñ tön’yağına yäki Misırdan Ğazzäneñ kön’yağına turıdan-turı kerü mömkin bulmawın belderde.

Yärdäm operaśiyäläre äkrenäyä

Xaq qayber möhim materiallarnıñ häm ictimağıy oyışmalar xezmätkärläreneñ kerüenä haman da röxsät birelmäwen, monıñ yärdäm êşçänlegen tağın da äkrenäytüen assızıqladı.

Xaq süzlärençä, kübesençä küçerelgän xalıq haman da waqıtlı sıyınu urınnarında yäşi häm alarnıñ kübese açıq yäki imin bulmağan urınnarda urnaşqan.

 BMO süzçese şulay uq cirle azıq-tölek citeşterüneñ bik awır buluın äytte.

 BMO analizına qarağanda, Ğazzädäge awıl xucalığı cirläreneñ barı tik 13%ı ğına zıyan kürmägän.

Parniklar, awıl xucalığı qoyıları häm asqormasınıñ 79–89%ı  zıyan kürgän, zäytün baqçaları häm ciläk-cimeş baqçalarınıñ 89%ı zarar kürgän yäki tulısınça yuq itelgän.

Cirle räsmi zatlar beldergänçä, İzrailneñ Ğazzädä 13 ay däwam itkän höcümnäre näticäsendä yaqınça 69 meñ keşe, şul isäptän kübese xatın-qızlar häm balalar üterelgän, 170 meñ 600dän artıq keşe yaralanğan.