Rusiyä ğaskärläreneñ Ukrainada Pokrovskqa kerüen alğa sörä
Pokrovsk - Ukrainanıñ Doneśk töbägendäge xärbi operaśiyäläre öçen ähämiyätle logistika üzäge
Rusiyä Ukrainanıñ könçığışında, Donetsk töbägendä urnaşqan Pokrovsk şähäre öçen köräştä alğa kitüen belderde. Anda inde ber yıldan artıq köçle bäreleşlär däwam itä.
Düşämbe könne Rusiyäneñ saqlanu ministrlığı beldergänçä, anıñ köçläre şähärneñ Prigorodnıy bistäsenä kerde häm anda üz pozitsiyälären nığıttı. Şulay uq, şähärneñ timer yul stantsiyäse häm sänäğat' zonasında bäreleşlär däwam itüe turında da belderelde.
Uzgan atnada Ukraina ilbaşı Volodimir Zelenskiy front sızığındağı şähärdä wäzğıyätne kontrol'dä totuların belderde häm şähärneñ uratıp alınuı turındağı süzlärne kire qaqtı.
Mäskäw Pokrovsk şähärendäge bäreleşlär barışında territorial' ciñülärgä ireşüen qat-qat belderde.
Pokrovsk Ukraina armiyäse öçen Donetsk töbägendä möhim logistika üzäk bulıp tora.
Ukraina xakimiyätläre Rusiyäneñ soñğı belderüe turında şunduq añlatma birmäde, häm konflikt barışında bäysez tikşerü ütkärü awır bulıp qala. Bu suğış2022 yılnıñ fevralendä başlanğan ide.
Ministrlık, şulay uq, tönge hawa höcümnäre başqaruın, alarnıñ xärbi sänäğat qorılmaları, Ukraina gaz häm ênergiä asqorması, xärbi aêrodrom häm qorallar tözätü üzägen maqsat itep aluın belderde.
Ukraina yaña Rusiyä hawa höcümnäre turında xäbär itä
Şul uq waqıtta, Ukraina xakimiyätläre tönge hawa höcümnäre turında xäbär itte. Alar arasında tönyaq-könçığışta urnaşqan Sumı töbägendä Trostyanets bistäsendä ber keşeneñ üterelüe häm könyaqtağı Nikolaev töbägendä ênergiyä asqormasına zıyan kilüe, 12 bistädä êlektr özelüe turında mäğlümat bar.
Soñğı aylarda, qış yaqınlaşqan sayın, Rusiyä häm Ukraina ber-bersenä qarşı ênergiä asqormasına höcümnären arttırdı.
Ukraina ğomum ştabı Saratov neft' êşkärtü obyektına tönge höcüm başqaruın häm bu qorılmanıñ zıyan kürüen belderde. Saratov gubernatorı Roman Busargin töbäktä dron höcümnäre qurqınıçı turında kisätkän ide, ämma zavod turında yäisä höcüm näticäläre turında mäğlümat birmäde.
Rusiyä saqlanu ministrlığı isä üzeneñ hawa saqlanu sistemalarınıñ 64 Ukraina dronın totqarlawın, şularnıñ 29ınıñ Saratov töbägendä bärep töşerelüen belderde.