AQŞ, Törkiyä, Paqıstan häm qayber ğaräp illäre BMOnıñ Ğazzä qararın tiz arada qabul itüne taläp itte

Amerika Quşma Ştatları belän Törkiyä, Misır häm Soğud Ğaräbstanı kebek kübese möselman häm ğaräp illäre BMO İminlek şurasın Donal’d Trampnıñ Ğazzä öçen täq’dim itkän tınıçlıq planın raslağan AQŞ proyektın mömkin qadär tizräk tawışqa quyarğa häm qabul itärgä çaqırdılar.

“Amerika Quşma Ştatları, Qatar, Misır, Berläşkän Ğaräp Ämirlekläre, Soğud Ğaräbstanı, İndoneziya, Paqıstan, Yordaniya häm Törkiyä bularaq xäzerge waqıtta İminlek şurasında qarala torğan qararga urtaq yaqlawıbıznı belderäbez”  diyelgän belderüdä proyektnıñ tiz arada qabul itelergä tiyeşlegenä basım yasaldı.

Uzğan atnada AQŞ, 15 äğ’zalı İminlek şurasında, 2 yıl däwam itkän İzrailneñ Ğazzädäge genośidınan soñ utnı tuqtatunı däwam itüne küzdä totqan häm Tramp planın yaqlağan tekst östendä räsmi söyläşülärne başlatqan ide.

“Bez bu iniśiativanıñ ixlas tırışlıq buluın assızıqlıybız. Bu plan izraillelär belän fälästinlelär arasında ğına tügel, ä böten töbäk öçen tınıçlıq häm totrıqlılıqqa iltkän yul täq’dim itä” diyelä belderüdä.

Pänceşämbe könne AFP tarafınnan kürelgän qarar proyektında Ğazzä öçen 2027 yılı azağına qadär wazıyfa başqaraçaq waqıtlı idarä organı bulğan  Tınıçlıq şurası tözü xuplana.

Proyekt şulay uq çik iminlegen täêmin itü häm Ğazzäne qoralsızlandıruğa yärdäm itü öçen İzrail, Misır häm yañadan äzerlänäçäk Fälästin poliśiyäse belän bergä êşläyaçäk Waqıtlıça xalıqara totrıqlılıq köçe tözügä dä röxsät birä.

 Êlekkege proyektlardan ayırmalı bularaq soñğı tekstta kiläçäktä Fälästin däwläte tözelü mömkinlege turında da süz bara.

Rusiyäneñ variantı

Comğa könge urtaq belderü Rusiyäneñ Şura äğ’zalarına üzeneñ al’ternatıw qarar variantın tapşırğannan soñ yasaldı.

AFP tarafınnan kürelgän tekstqa qarağanda, Rusiya proyektında  tınıçlıq şurası tözü yäki  Ğazzägä  xalıqara köçlärne tiz arada cibärü röxsät itelmi.

Rusiya versiyäsendä utnı tuqtatuğa yul açqan iniśiativa xuplana ,läkin Tramp iseme telgä alınmıy.