Amerika häm Rusiyä räsmi zatları Floridada küreşäçäk
Ukraina söyläşüläre däwam itäçäk läkin Mäskäw citäkçelege qırıs taläplärennän waz kiçmi
Ukrainalı häm Awrupalı partnyerları belän uzğan söyläşülärdän soñ Amerikalılar Rusiyä räsmi zatları belän Floridada küreşep söyläşäçäk. Läkin Mäskäw citäkçelege qırıs taläplären däwam itterä.
Oçraşu şimbä könne bulaçaq.
AQŞ ukrainalı häm awrupalı räsmi zatlar belän söyläşülärne comğa könne ütkärde.
Rusiyä liderı Vladimir Putinnıñ ilçese Kirill Dmitriev diplomat Stiv Uitkoff häm Trampnıñ kiyäwe Djared Kuşner belän küreşäçäk Rusiyä delegaŝiyasen citäkli. Milli iminlek kiñäşçese Marko Rubionıñ da söyläşülärdä qatnaşa aluı citkerelde.
Monnan aldağı söyläşülär Uitkoffnıñ Mayamidağı golf klubında uzdı.
Bu atna başında Amerikalı, Ukrainalı häm Awrupalı räsmi zatlar suğışnı tuqtatu öçen alıp barıluçı söyläşülär qısalarında Kiyev citäkçelege öçen qurqınıçızlıq garantiyaläre mäs’äläsendä alğarışnıñ täêmin itelüen belderde läkin bu şartlarnıñ Mäskäw citäkçelege tarafınnan qabul itelep itelmäyäçäge bilgesez.
“Reuters”ka belderü yasağan ber Rusiyä çığanağına kürä Dmitriyev häm Ukrainalı söyläşüçelär arasında söyläşü ixtimalı yuq.
AQŞnıñ küzläw xisaplarına qarağanda Rusiyä ilbaşı Putin Ukrainanı tulısınça qulğa töşerü niyätendä. Bu wazğıyät qayber AQŞ räsmi zatlarınıñ Mäskäw citäkçelegeneñ tınıçlıq urnaştırırğa äzer buluı turındağı belderülärenä turı kilmi.
Putin Mäskäwdäge yıllıq matbuğat oçraşuında kompromiss turında süz barmawın citkerde. Ul Rusiyäneñ suğışnı tuqtatu şartlarınıñ 2024 yılnıñ iyunennän birle üzgärmäwen assızıqladı. Alar: Ukrainanıñ NATOğa quşılu maqsatınnan waz kiçüe häm Rusiyä üz cirläre itep kürgän 4 Ukraina töbägennän tulısınça çigenüe.
Kiyev citäkçelege 4 yıl diyärlek baruçı suğışta Rusiyä qulğa töşerä almağan cirlärdän kitmäyäçägen äytä.