AQŞ, İranğa qarşı suğış arqasında, Yaqın Könçığışqa 10 000 östämä ğaskäri cibärergä uylıy
Planlaştırılğan bu urnaştıru cäyäwle ğaskär berämleklären häm köbäle texnikanı üz êçenä alaçaq.
Matbuğatta çıqqan xäbärlärgä qaraganda, Pentagon AQŞ İlbaşı Donald Trampnıñ Tähran belän mömkin bulğan tınıçlıq söyläşülären bäyälägän waqıtta, xärbi variantlarnı arttıru maqsatı belän Yaqın Könçığışqa 10 000gä yaqın östämä gäskäri cibärü xaqında uylıy.
“Wall Street Journal”ğa kürä, Saqlanu ministrlığı räsmiläre bu urnaştırunıñ cäyäwle ğaskär berämleklären häm köbäle texnikanı üz êçenä alaçağın äytte.
Östämä köçlär töbäkkä moña qadär cibärelgän 82nçe Hawa-desant diviziyäsennän meñnärçä paraşütçı häm yaqınça 5 000 diñgez pexotaçısına quşılaçaq.
Gäskärilärneñ qayda urnaştırılaçağı bilgesez bulıp qala, läkin wäqalätlelär alarnıñ İran häm bu ilneñ yarlarındağı möhim neft êksportı üzäge bulğan Xarg utrawınıñ operatsion radiusı êçendä urnaştırılu ixtimalın belderde.
Tramp AQŞ berektäşläreneñ yärdäme belän yäki alardan başqa "Ormuz buğazın açunı" maqsat itüen äytä.
Aq Yort matbuğat süzçese urınbasarı Anna Kelli: "Gäskärilärne urnaştıruğa qağılışlı barlıq iğlannar suğış (saqlanu) ministrlığınnan kiläçäk," — dide.
Kelli, monnan tış: "İlbaşı Trampnıñ qaramağında härwaqıt barlıq xärbi variantlar (köçlär) bar," — dip östäde.