Qıtay Ğazzädä “kiñqırlı utnı tuqtatu” çaqıruın aşığıç räweştä qabatladı
Yuğarı däräcäle diplomat Wang Yi, İzrailneñ Ğazzä sızığın basıp alu tırışularn häm yaw astındağı Yordannıñ könbatış üzänlegen “anneksiyäläw” kereşülären tänqitläp, İzrail ğämälläreneñ "xalıqara xoquqnı citdi räweştä bozuın” belderde
Qıtay xalıqara cämäğätçelekne Ğazzädä "kiñqırlı utnı tuqtatu" öçen aşığıç räweştä çaralar kürergä çaqırdı, şulay uq Fälästin däwläten tanunı yaqladı.
“Xinhua” däwlät xäbär agentlığı citkergänçä, Qıtay Tışqı eşlär ministrı Wañ Yi Ğazzädä humanitar faciğäneñ tağın da tiränäyüen buldırmas öçen "iñ zur aşığıçlıq belän kiñqırlı utnı tuqtatu" kiräklegen belderde.
Ul bu süzlärne Pekinda Marokko tışqı eşlär ministrı Nasser Bourita belän oçraşu waqıtında äytte häm xalıqara cämäğätçelekne Fälästindäge xäzerge krizisnı çişü öçen berdäm bulırğa çaqırdı.
Ul İzrailgä tä'sir yasarğa sälätle illärne, BMO İminlek Şurasın häm humanitar oyışmalarnı üz cawaplılıqların ütärgä çaqırdı.
Wañ Yi "Fälästinnär Fälästinne idarä itä" digän prinśipnı tormışqa aşıru zarurlığın äytte, Ğazzäne häm yawlap alınğan Yordannıñ Könbatış üzänlegen Fälästinneñ "ayırılmas cirläre" dip tanırğa kiräklegen belderde. Ul, şulay uq, suğıştan soñ citäkçelekne oyıştıru barışında Fälästin xalqınıñ teläklärenä xörmät belän qararğa häm alarnıñ xoquqların yaqlarğa kiräk, dip östäde.
Ul Fälästinneñ BMOda tulı äğza buluın yaqladı häm ike däwlät çişeleşen alğa alıp baru zarurlığın belderde, monı bozuçı ber yaqlı ğämällärne kire qaqtı.
Ğazzädä däwam itüçe genotsid suğışı häm anıñ näticäsendä barlıqqa kilgän humanitar faciğa turında tirän borçılu belderep, ul İzrailneñ Ğazzä şähären basıp alu plannarın häm yaw astındağı Yordannıñ könbatış üzänlegen “anneksiyäläw” kereşülären tänqitläde. Bu ğamällär "xalıqara xoquqnı citdi räweştä boza" häm ike däwlät çişeleşenä häm Yaqın Könçığış totrıqlılığına yanıy, dip belderde.
İzrailneñ däwlät xoquqına iyä buluın yaqlawçı Wañ Yi Fälästinneñ dä şulay uq däwlät xoquqına iyä buluına basım yasadı. "İkeyaqlı standartlar"nı kire qağuın häm izraillelärneñ häm dä ğäräplärneñ tormşlarınıñ tigez däräcädä qimmätle buluın häm köç qullanuğa köç qullanıp cawap birüneñ barı tik näfrätne genä arttıruın äytte.
Wañ monnan tış Qıtaynıñ Fälästinneñ "ğadel däğwasın" yaqlarğa, utnı tuqtatunıñ täêmin itelüe häm BMO qararları belän ike däwlätle çişeleş nigezendä daimi häm ğädel çişeleşkä ireşü öçen êşlärgä däwam itäçägen iskärtep uzdı.