Tramp AQŞnıñ qoral citeşterüen dürt tapqır arttıraçağın belderde

AQŞ ilbaşı Donald Tramp, İran belän bäreleşneñ cidençe könenä kergändä, zur Amerika saqlanu sänäğate şirkätläreneñ yuğarı sıyfattağı qoral citeşterüne dürt tapqırğa arttırırğa rizalaşuın belderde.

İran soñğı könnärdä Yaqın Könçığıştağı AQŞ bazaların maqsat itep ala, AQŞ-İzrailneñ “Timer gömbäz”, “Dawıtnıñ sapanı” häm “Patriot” batareyäläre kebek hawa saqlanu sistemaların ütep kerü öçen tığız höcüm taktikaları qullana. Bu xäl AQŞ-İzrailneñ raketalarnı totqarlawçı qorallarınıñ ozın waqıtqa citärlek bulmawı şöbhäsen uyattı.

Tramp comğa könne “Truth Socia”l platformasındağı yazmasında “AQŞnıñ iñ zur saqlanu sänäğate citeşterüçeläre” belän oçraşuı turında äytte.

AQŞ ilbaşı şirkätlärneñ yuğarı sıyfattağı qorallarnı citeşterüne arttırırğa riza buluın belderde. Süz yuğarı tögällektäge häm aldıngı texnologiyäle xärbi sistemalar turında bara.

AQŞ ilbaşı citeşterü quäten kiñäytü buyınça êşlärneñ oçraşudan öç ay êlek başlanuın da belderde. Tramp bu qorallarnıñ kübeseneñ citeşterüe häm qorılmaları xäzerdän ük êşli başlawın äytte.

Ul, şulay uq, AQŞnıñ başka qoral törlärennän dä zur külämdä zapasları buluına basım yasadı. AQŞnıñ urta häm urta-yuğarı sıynıf suğış kiräk-yaraqlarında “çiksiz diyärlek täêminatqa” iyä buluın äytkän Tramp, bu qorallarnıñ İranda qullanıluın häm küptän tügel Venesuêlada da qullanıluın citkerde.