Törkiyä Gretsiyädä törek azçılığı mäktäbenä yasalğan höcümne tänqıytläde
Törkiyä Gretsiyädäge törek azçılığınıñ qurqınıçsızlığın täêmin itü häm höcüm itüçelärne tiz arada açıqlaw öçen aşığıç çaralar kürergä çaqırdı.
Törkiyä Gretsiyäneñ Könbatış Trakiya töbägendäge Rodopi qalasına bäyle Karacaoğlan awılında yäşäwçe törek azçılığına qarawçı ber başlanğıç mäktäpkä kemlege bilgesez keşelär tarafınnan yasalğan höcümne tänqıytläde.
Tışqı êşlär ministrlığı süzçese Öncü Käçäli comğa könne “X” sotsial' çeltärendä: “Gretsiyäneñ Könbatış Trakiya töbägendäge Karacaoğlan awılında urnaşqan häm 2021-2022nçe uqu-uqıtu yılında Gretsiyä dairäläre yapqan Könbatış Trakiya törek azçılığına qarawçı başlanğıç mäktäpkä kemlege bilgesez keşelär tarafınnan yasalğan höcümne ğayeplibez,” – dip belderde.
Karacaoğlan awılındağı höcüm, cirle xalıqnıñ 4 ğıynwarda yasalğan zıyannı kürep aluı belän mäğlüm buldı; şunnan soñ politsiyä tikşerü başladı.
Käçäli, höcümneñ cawaplısı kem genä bulsa da, Gretsiyä dairälärennän waqıyğanıñ açıqlanuın, cinayätçelärneñ aşığıç räweştä tabıluın häm kiräkle çaralar kürelüen kötülären äytte. Şul uq waqıtta ul: “Karacaoğlan’da yäşäwçe qardäşlärebezneñ qayğısın urtaqlaşabız. Törkiyä isemennän Könbatış Trakiya törek azçılığınıñ Lozanna tınıçlıq kileşüe belän gäraintiyägä alınğan xoquqların häm mänfäğatlären yaqlawnı däwam itäçägebezne assızıqlıybız,” – dide.
Könbatış Trakiya törek azçılığı Konsul'tativ şurası da, moña oxşaş waqıyğanıñ êlegräk tä buluın xäterlätep, höcümne tänqıytläde.