AQŞ ilbaşı urınbasarı Ğazzädäge utnı tuqtatunıñ däwam itüenä ömet belän qarıy
Djeyms Dêvid Vêns Ğazzädäge utnı tuqtatunı möhim forsat dip bäyäli.
AQŞ viśe – prezidentı Djeyms Dêvid Vêns çärşämbe könne Ğazzädäge utnı tuqtatu kileşüen ğamälgä aşıru häm anıñ näticäläre turında optimistik qaraşta buluın belderde.
Qodüstäge ofisında Netan’yaxu belän oçraşudan soñ ul jurnalistlarğa:
“Utnı tuqtatunıñ däwam itäçägenä häm böten Yaqın Könçığışta yaxşı kiläçäk tözi aluıbızğa ışanam. Läkin bu tırışlıq taläp itä”,— dide.
Vêns şulay uq:
“Barı tik soñğı cide kön êçendä başqarılğan ğamällärgä qarap, moñarçı ber dä êşlänmägän närsäne tormışqa aşıru öçen iskitkeç yulda buluıbıznı uylıym”, — dip östäde.
İzrail prem’yer-ministrı Netan’yaxu isä AQŞ ilbaşı urınbasarı belän Ğazzäne yañadan torğızu, şulay uq utnı tuqtatu kileşüe qısalarında idarä häm iminlek mexanizmnarın buldıru turında söyläşülär alıp baruların belderde.
İzrail matbuğatı mäğ’lümatına qarağanda, Vêns İzrail ilbaşı İśxaq Gerśog belän dä oçraşaçaq.
AQŞ ilbaşı urınbasarı 10 oktyabr’dä Ğazzädä üz köçenä kergän utnı tuqtatunıñ ğamälgä aşırıluın küzätü häm AQŞ ilbaşı Donal’d Tramp planınıñ ikençe êtabın yuğarı däräcäle İzrail räsmi zatları belän söyläşü öçen sişämbe könne İzrailgä öç könlek säfär belän kilde.
Plannıñ berençe êtabı fälästinle totqınnarğa almaşqa İzrail totıqların azat itüne küzdä tota ide.
Plan şulay uq Ğazzäne yañadan torğızunı häm “Xamas” qatnaşmağan yaña idarä mexanizmı buldırunı üz êçenä ala.
Ğazzädäge sälamätlek saqlaw ministrlığı mäğ’lümatlarına qarağanda, İzrailneñ 2023 yılnıñ oktyabrennän birle däwam itkän genośid xarakterındağı suğışı näticäsendä Ğazzädä 68 meñ 200dän artıq keşe ülgän, 170 meñ 300dän artıq keşe yaralanğan.