Ant itü tantanası ( Qırğızstan)

Qırğızstanda referendum yulı belän ilbaşı wäqalätlären üz östenä aluçı waqıtlı xökümät Premyer-ministrı Roza Otunbayeva ant itep wazıyfasına kereşte. Bişkäk kontsertlar zalında ütkärelgän ant itü tantanasında Qırğızstan Üzäk saylaw komissiyäse başlığı Akılbek Sariyev Qtunbayevanı Qırğızstan ilbaşı dip iğlan itte. Otunbayeva 27 nçe iyündä ütkärelgän referendumda qabul itelgän yaña Töp qanunnı totıp ant itte. Qırğızstan milli gimnı yañğırağannan soñ çığış yasawçı Roza Otunbayeva Qırğızstan xalqınıñ 5 yıl eçendä 2 inqıylap kiçerüennän sabaq alırğa kiräklegen , 7 nçe apreldä izge maqsat öçen canın birgän 86 qaharmannıñ onıtılmayaçağın belderde.

Roza Otunbayeva ilneñ könyağında yäşängän tragedik waqıyğalarğa tuqtalıp:” Qızğanıç, Oş häm Cälälabad ölkälärendä qara köçlär yözennän ğayepsez keşelärneñ ğomere özelde”,-dide. Yaqınça yartı säğat däwam itkän ant itü tantanasında Törkiyä Tışqı eşlär ministrı Ahmet Davutoğlu , waqıtlı xökümät räsmi zatları , cirle häm däwlät citäkçeläre, yazuçılar häm ğalimnär , çit illärneñ tulı wäqalätle ilçeläre häm missiya şefları qatnaştı.

Awraziya iqtisadıy cämğıyäteneñ yuğarı däräcäle oçraşuı (Qazaqstan)

Qazaqstannıñ başqalası Astanada Awraziya iqtisadıy cämğıyäteneñ yuğarı däräcäle oçraşuı uzdı. Astanadağı Akorda ilbaşı idaräse sarayında ütkärelgän cıyılışta Qazaqstan ilbaşı Nursoltan Nazarbayev, Rusiya däwlät başlığı Dmitriy Medvedev, Tacikstan ilbaşı İmamali Rahman, Belarus däwlät başlığı Aleksandr Lukaşenko, Qırğızstan ilbaşı Roza Otunbayeva belän berrättan ,Ärmänstan häm Ukraina küzätüçe il bularaq qatnaştı.

2000 yılda qorılğan Awraziya iqtisady cämğıyäte Astanada uzğan cıyılışında üzeneñ 10 yıllığın da bilgeläp ütte. Yuğarı däräcäle oçraşunıñ açılışında çığış yasawçı Qazaqstan ilbaşı Nursoltan Nazarbayev qatnaşuçılarğa räxmätlären belderep, 10 yıl eçendä başqarılğan eşlär turında söyläde. Qazaqstan liderı Nazarbayev Rusiya, Qazaqstan häm Belarus arasında tözelgän Tamğaxana berlegeneñ töbäk illäre öçen zur ähämiyätkä iyä buluın belderep, Qazaqstannıñ bu berlektä aktiv rol uynayaçağın citkerde. Awraziya iqtisadınıñ üsüe, qalqınuı öçen töbäk illäreneñ küp eşläwe, zur tırışlıq kürsätüe kiräklegenä iğtibarnı yünältüçe Nursoltan Nazarbayev , här ilneñ üz wazıyfasın cirenä citkerüe zarurlığına basım yasadı. Cıyılıştan soñ Belarus, Qırğızstan , Tacikstan , Rusiya häm Qazaqstan arasında yaña xezmättäşlek kileşülärenä qul quyıldı. 5 yıl elek Awraziya iqtisadıy cämğıyäte äğzalığın tuñdırğan Belarus äğzalığın qabat aktivlaştırdı.

“7 däwlät 1 millät bayraq alanı“ nıñ açılışı (Törkiyä)

Törkiyäneñ iñ zur bayrağı astında 7 tuğandaş däwlätneñ bayraqları cilferdi. Bursada Ahmet Taner Kışlalı mäydanınıñ ber öleşendä urnaşqan häm 7 tuğandaş il bayraqları cilferdägän “7 däwlät 1 millät bayraq alanı“tantanalı räweştä açıldı.

Azärbaycan, Törekmänstan, Qırğızstan , Tönyaq Kipr Törek Cömhüriyäte , Üzbäkstan, Qazaqstan häm Törkiyä bayraqları yuğarı kütärelgän tantanada Qazaqstan ilçelege mädäniyat attaşese (baş belgeç) Nişangül Nazarayeva çığış yasadı. Qazaqstannıñ bäysezlegen añlatuçı Nazarayeva Atatörek qorğan Törkiyä Cömhüriyäte belän bergälektän bik qanäğat buluların citkerde. Yıldırım cirle xakimiyäte başlığı Özgen Keskin törki xalıqlarnıñ zur geografik kiñlektä berlek häm bärabärlek eçendä yäşäwen belderep:” Ahmet Taner Kışlalı isemendäge bu mäydannıñ ber öleşe “7 däwlät 1 millät bayrağı” alanı buldı. 80 metr biyeklegendä 340 kv.metr kiñlegendäge Törkiyäneñ iñ zur bayrağı astında cilferdäyäçäk 7 qardäş däwlätneñ bayraqları Törkiyä häm başqa däwlätlär öçen dä zur mäğnägä iyä. Bu bezneñ tuğannarça yäşäwebezneñ kürsätkeçe”,-dide. Çığışlardan soñ här il wäkile Törkiyäneñ milli gimnı “Bäysezlek marşı” astında üz ile bayrağın yuğarı kütärde.

6 nçı Xalıqara Törkiyä xalıq şağıyrläre bäyräme (Törkiyä, Bursa)

Yıldırım cirle xakimiyäte tarafınnan traditsion 6 nçı Xalıqara Törkiyä xalıq şağıyrläre bäyräme ütkärelde. Bäyräm qısasında “Barış Manço” isemendäge Mädäniyat üzägendä uzğan yılğı cıyında töşerelgän fotoräsemnärdän torğan kürgäzmä açıldı. Bäyrämdä 8 ildän xalıq şağıyrläre qatnaştı. Törkiyä, Azärbaycan, Qazaqstan, Üzbäkstan , Qırğızstan , Törekmänstan , Tönyaq Kipr Törek Cömhüriyäte häm Çuvaşstan üzidaräle cömhüriyätennän tuplam 81 xalıq şağıyre köç sınaştı, ciñüçelärgä büläklär tapşırıldı.

“Köruğlu”operasın säxnägä quyu ( Törkiyä)

Könçığışnıñ häm törek-İslam sänğat dönyasınıñ berençe opera äsärlärennän qabul itelgän häm TURKSOY tarafınnan äzerlängän “Köruğlu”operası bıyıl berençe tapqır ütkärelüçe Xalıqara İstanbul Opera festivaleneñ 23 nçe iyül könendä uzaçaq yomğaqlaw tantanasında säxnägä quyılaçaq.

TÜRKSOY Ğomum särqatiblegennän yasalğan açıqlawda , 1 nçe Xalıqara İstanbul opera festivalendä törek mädäniyatı häm tormışın çağıldıruçı milli operalarnıñ kiñ urın aluı belderelde. “Saraydan qız qaçıru”, “Fatih Soltan Mehmet” , “Zaide” kebek äsärlär belän bergä “Köruğlu” operasınıñ da törek mädäniyatın yaqtırtuçı äsärlär arasında buluı belderelgän açıqlawda , älege operanıñ 23 nçe iyüldä säxnägä quyılaçağı citkerelde.

Açıqlawda Azärbaycan kompozitorı Üzeyir Hacıbeylineñ ülemsez äsäre bulğan “Köruğlu” operasınıñ Könçığışnıñ häm törki-İslam sänğat dönyasınıñ berençe opera äsärlarennän berse buluına basım yasaldı. Açıqlawda şulay uq TÜRKSOY Ğomum särqatiblegeneñ bu ülemsez äsärne yaña sänğat citäkçelegendä, törki dönyanıñ tanılğan sänğatçeläre belän bergä qabat säxnägä quyu öçen 2009 nçı yılda eşçänlek başlatuı da xäterlätelde. Ozaq yıllar TÜRKSOY Ğomum särqatibe Düseyn Kaseinov citäkçelegendä alıp barılğan Xalıqara “Köruğlu” operası proyektınıñ TÜRKSOYğa äğza bulğan 6 ildän (Törkiyä, Azärbaycan, Qazaqstan, Qırğızstan, Tatarstan, Başqortstan) 250 sänğatçe qatnaşında uzğan yıl uñışlı tormışqa aşırıluı beldrelde.

TÜRKSOY tarafınnan äzerlängän “Köruğlı” operası 2009 nçı yılnıñ 8-18 nçe sentyabr könnäre arasında Bişkäk , Alma-Ata, Änkara häm Baqıda säxnägä quyıldı.Berençe tapqır törek telendä säxnägä quyılğan “Köruğlı” operasında Ahmet Agadi (Köruğlu, Tatarstan), Gülzad Daurbayeva (Nigar, Qazaqstan), Yoldaş İsrailov (Ayvaz, Qırğızstan), Emrah Sezen (Soytarı, Törkiyä) kebek solistlar qatnaştı.

Tapşırunıñ podkast (mp3) yazmaları

Tapşıru turında fikerläregezne citkerü öçen basığız

Tapşırunıñ tawış cıyılmasına (XML) yazılu öçen basığız